musikkapelle

Musikgedicht

Die Höhen und Tiefen eines Musikanten

 Na, wenne asou hinta sinn 

af wose do oll kimm.

 

Seima fria asou za de Feschltan gfoagn,

hintn afran LKW - vellik dafroagn.

 

Da Ausflug woa meischtns a "Foacht ins Blaue",

de Schlofgeleignheit woa nie a genaue.

Heint isch des olls güt organisiacht,

und decht is unlägscht an Musikantn passiacht,

dassn da oane ihn it hot ins Zimma gelossn,

bold was zan schlofn woagn af da Strossn.

  I denk ma, ament

hottanin eppa nemma gekennt.

Sellane Ausflüge keagng schin ogelichtet.

Do homa amol an Fotograf vapflichtet,

oba leida isch do drausse nix woagn

ea isch nämlich une Apparat hoamgfoagn.

 

Damit'is secht, wosis ba uns olls geit:

Amol hot a Musikantin a Linse vakeit.

In Elfashausn seima af de Knie umagekrochn,

dei wama wa fin, des wa decht zan lochn,

as wie wenn a jeda in Boudn pussn tat,

hot galsch aoan gfrog: "Sucht ihr Regenwürmer, oder wat?"

Desebm hont olle a güts Sitzleida gehob,

de Inschtrumentnbesetzung fan "Weckruf" woa in negschtn tog knopp,

oba a va de Bewohna va Elfashausn

hot ma it viel gsechn manondasausn.

 

A jede Musikkapelle schaug dassis sou weit bring,

dass se amol in de Medien kimmb.

Unsre isch it gonz freiwillik drinne geweisn

hot man gekinnt in da Zeitinge leisn.

Oba a de Schreibarin is it daflouchn

in Foschink homase kräftik durchn Kakau gezouchn.

Wenn's Musikalische olls passt und es geth nix daneibm,

isch ba da Musik a gonz a feins Zommeleibm!!!

 

Na, ban Deifreggare homa amol a Verdi Stickle vahaut,

nochn Konzerte hot sich koana mea ins Goschthaus getraut.

 

Oba's Schlimmschte isch und des misse sogn,

wenne misch an jung Musikantn ze Grobe trogn.

Oftramol geits a eppas zan Schtreitn

wie holt ibaroll hent bessare und letzare Zeitn.

 

Weil i gspielt hun, woagns siebm Kapellmoaschtare genau,

und schtellts enk via, nou olleweil de gleiche Ehefrau!

Jo, de Frauin missnt's woll daleidn, wenn man seltn dahoame isch,

nou dazü, wenne baran ettlane Vareine bisch.

De Musik kunnsche a it ols Hobby betreibm

und wenn's nix fein isch dahoame bleibm.

In merischtn get's holt asou wie mia,

af da Orbat schimpft oan da Polia

und gent nochant zobmscht weank za da Proube,

bekimmsch oftramol a Unreide, a groube,

kimmsche nochant zeschpate hoam ins Bette,

isch die Unschproche a goa koa nette.

 

I will jo it mit mei Gscheitheit auftrumpfn,

oba a in da Kirchn weagng lei dei, wos do hetn, gschumpfn.

I will a dazeiln va de feinen Sochn,

umin Nochwux brauchma uns koane Sorgn ze mochn.

Se kemmint za uns, güt ingeleagng,

Olt und Junk hont's Gfiehl, dasse zomme keagng.

 

An jedn jung Mensch tate rotn, za da Musik ze giehn,

ma keacht gschwind dazü und kimmb vanoacht hin!

Do weasche gfordacht mit dein Talent

und wenne nochand de Konzerte a nou güt besuacht hent

und du heasch in Beifoll oft aucharauschn, machsche mitn koan Mentsche tauschn.

Oft schtesche und denksch volla Rant:

I bin a Virga Musikant!!

 

PS: Da Konzetbesuach keidit in Virgn woll Nöt,

denkt's decht drun: Da Applaus isch des Künschtlas Bröt.

Es tat uns wilde wouhl

wa da Dorfplotz bengelat voull.

 Magda Bacher, Virgen